Liv Bratterud – torsdag 12. september kl 19.00

Eventyrforteljaren og balladesongaren som miste alt

Olav Solberg har nyleg gitt ut bok om Liv Bratterud (1826-1892) frå Bø, og denne kvelden vil han fortelje om henne og lagnaden hennar. I motsetning til mange andre tradisjonsberarar kom ho frå gode kår i det gamle Bøherad. Likevel enda ho opp som husmannskvinne på ein armodsplass i ville skogen. I ettertida er ho kjend som balladesongar og framifrå eventyrforteljar.
I boka si følgjer Solberg Liv Bratterud frå vogge til grav. Vi får også høyre om familien hennar – døtrene, ektemannen som drakk og slektningar som prøvde å hjelpe.
Olav Solberg er professor emeritus i nordisk litteratur ved Universitetet i Søraust-Noreg. Han har gjeve ut ei lang rekke bøker og vitskaplege artiklar og er ein av våre fremste spesialistar på folkedikting og mellomalderlitteratur.
Inngang kr 120 inkl enkel servering.

Liv Bratterud.

Gamle plagg fortel (seminaret er fullteikna)

NB: Seminaret er fullteikna.

Dagsseminar om folkedrakter med Kari-Anne Pedersen og Terje Lia laurdag 21. september 2024 kl. 09.30-16.00.
Stad: Bø museum, Oterholtvegen 148, 3802 Bø,

Kva kan me lære av gamle draktdelar? Går me gamle plagg etter i saumane – i bokstaveleg forstand, kan me hente mykje kunnskap om korleis dei er laga. Denne kunnskapen har me stor nytte av når me skal framstille bunader i dag. Dette er temaet for seminaret med Kari-Anne Pedersen og Terje Lia på Bø museum. Dei er begge svært opptekne av dette, og har lang erfaring frå feltet. Kari-Anne Pedersen, Oslo, er nyleg pensjonert konservator frå Norsk folkemuseum, der ho hadde ansvar for folkedrakter. Ho har skrive fleire bøker om emnet, og har fokusert på draktskikken i Aust-Telemark. Terje Lia frå Notodden er sjølverklært «bunadsnerd», han har laga bunader i ei årrekke og leverte nyleg bunad til prins Sverre Magnus. Han har mykje gamalt draktmateriale i sitt eige, som ei studiesamling, og ein del av dette vil han ha med seg til seminaret. Vidare blir det høve for deltakarane til å ta med gamle draktdelar som dei ønsker å få kommentar til.

Kl. 09.30: Frammøte og kaffi på Åheim, pakkbua
Kl. 10.00: Seminaret startar
Kl. 12.00: Dugurd (lunsj) på Polen
Kl. 13.00: Seminaret fortset
Kl. 16.00: Slutt

Deltakaravgift: Kr. 400,- inkl. kaffi ved ankomst, og dugurd.
Påmelding skjer på epost til post@bomuseum.no eller sms til nr 90136992. Deltakaravgifta betalast til Bø museum, konto nr. 2630.07.11269 eller Vipps nr 512181. Merk betalinga «Folkedraktseminar» og namn. Frist for påmelding og betaling av deltakaravgift er måndag 16. september. På grunn av plassen set me eit tak på 30 deltakarar. Meld gjerne frå om evt. allergiar ved påmelding, med tanke på serveringa.

Kari-Anne Pedersen, foto Helge Brekke.

Sommar på Bø museum

Bø museum er ope frå 29. juni til og med 28. juli, kl 12.00 til kl 17.00, tysdag til sundag.
Sommarutstilling «Hundre år med jernbane».

Sundag 28. juli er siste opningsdag i sommar. Kl 15.00 vil Atle Tjønnås presentere nokre av felene i samlinga på Bø museum. Han har fått med seg drangedøl og spelemann Herman Gautefald som lar oss få høyre korleis dei let.
Frå ca kl 13.00 er det sal av kjøttsuppe, og sjølvsagt kaffi og vaffel, is, kake. Velkomen!

Arrangement sommaren 2024

Laurdag 29. juni kl. 13.00 Opning av sommarutstillinga «Hundre år med jernbane». Program med bl a Gunleik Hynne og elevar ved Kulturskulen. Kaffi og kaker. Inngang 100 kr.
Sundag 30. juni kl. 17.00: Bygdevandring på Bø stasjon med Gunleik Hynne
Sundag 7. juli kl. 17.00: Konsert med gruppa Telehiv; Mari Foss, Harald Foss og Helge Røys: Nye og gamle grendeviser
Sundag 14. juli kl. 15.00: Bygdevandring på Oterholt med Finn Rønning
Sundag 21. juli kl. 15.00: Bø for hundre år sidan, ved Halvor Kleppen
Sundag 28. juli kl. 15.00: Atle Tjønnås og ein felespelar presenterer hardingfeler frå samlinga til museet
Museumsbutikk og kafe.
Velkomen til Bø museum i sommar!

Sommarutstillinga har fått støtte frå Telemark fylkeskommune.

Kvennøya

I mai har bålplassen på Kvennøya fått ei oppgradering. Gamal bålplass er fjerna, det er lagt eit område med grus, og ny bålring er bygd opp. Steinane har museet fått frå Steinsenteret, og Tor Sisjord har laga nye benkar.

Og her er dugnadskarane frå venstre: Karl Magne Verpe, Rolf Steinsland, Karl Åge Liland og Eivind S. Forberg.

Ei oppfordring til alle, hald plassen ryddig og fin, og ta med søppel heim!

Kulturtur i Limarka tysdag 28. mai – turen er utsett til tysdag 4. juni pga varsla regn

Store-Jon Høgsås og Kari G. Forberg på Høgsås 1939

Avreise frå Bø torg kl 17.00.
Denne gongen går turen til Limarka. Gunleiv Brukås har fått med seg Halvor Gåra som kjentmann, og me får høyre om folk og hendingar frå plassar som Stavsholt, Ormstunga, Høystul og Høgsås. Me reknar med ein tur på omlag 3,5 km, men som kan avpassast etter ver og kondisjon. Undervegs tar me ein kaffirast, så ta med deg litt i sekken. Avreise frå Bø torg kl. 17.00 for felles kjøring.
Bø museum i samarbeid med Bø turlag.

Årsmøte Bø museum – Kristin Kleppen attvalt som leiar

Bø museum hadde årsmøte 21. mars, med gledeleg godt frammøte, 29 personar. Kristin Kleppen blei attvalt som leiar, og dei andre i styret er: Jørn Berget, Kari Rast Monge, Kari Lønnestad, Geir Sønstebø og Ingrid Smedstad som er Midt-Telemark kommune sin representant.
Etter årsmøtesakene fortalde Gunleik Hynne litt som sommarutstillinga i år, som skal handle om Bø stasjon 100 år. Protokoll frå årsmøtet.

Eg diktar ikkje – eg fortel berre sanninga

Hæge Manheim og Oddbjørn Aase

Me er to utøvande kunstnarar busette i Seljord som ynskjer å lyfte fram Seljordsdiktaren Halvor J.
Sandsdalen (H.J.S).
Musikar Oddbjørn Aase og skodespelar Hæge Manheim vandrar i diktinga til ein smålåten, men stor diktar. Me tek tak i dei tonesette dikta, men også korte dikt og tekstar – altså ein kabaret. Her er tilsynelatande små tema som belyser store ting i livet og verda – med underfundig humor og vemod, men også satire og beiske spark til øvrigheita. H.J.S. ser livet frå småkårs folk si side.
Du kan høyre Hæge og Oddbjørn på Åheim, Bø museum torsdag 11. april kl 19.
Inngangspengar kr 200.

Bø Museum – årsmøte 21. mars 2024

Solnedgang ved Oterholt 26. januar 2024.

Bø Museum har årsmøte torsdag 21. mars 2024, kl 19.00 på Polen.
Frist for innsending av saker til årsmøtet er 1. mars. Saker kan sendast på e-post til post@bomuseum.no, alternativt ta kontakt med leiar Kristin Kleppen, tlf 97654936.
Årsmøtepapira finn du her.

Bø-kalenderen 2024

Frå slutten av 1980-talet har Bø Museum kvart år gitt ut ein kalender med historiske bilde. Bø-kalenderen for 2024 kan du nå få kjøpt hos Brage Bok (tidlegare Akademika) i Bø-gata og hos Norli Bøsenteret. Kalenderen kan også tingast i nettbutikken til Bø Museum, https://aaheim-landhandel.no/

Bø-kalenderen 2024 har stoff frå:

• The Others
• Bø mølle i over 70 år
• Lifjøll I.L. og Lifjøllbakken
• Transport til Tokke-anlegga
• Pløying med traktor på Borgja
• Idrettsmannen Tor Bergland
• Øygards-området
• Bø Handelsskule
• Oppheim, garden rett opp for Bø stasjon
• Hos fotografen
• Ingeborg og Eivind Fosstveit
• Jernbanen i Bø 100 år

Julemesse på Bø Museum 25. og 26. november 2023

Frivillige ved Bø Museum er godt i gang med førebuingar til julemessa, blant anna baking av småkaker. Stor etterspørsel etter kakene, og mange damer er fleire kveldar på Bø skule for å fylle opp boksar med småkaker. I tillegg til småkaker, er det sal av nybaka brød og julekake, kransekaker, kling og andre matprodukt i Åsestugo også i år.
På Pakkbua / Åheim er det julebutikk, sal av Bø-kalenderen 2024, bøker og ulike gåveartiklar; som strikkeprodukt og andre handverksprodukt.
Polen kafe er open; sal av graut laurdag og kjøtsuppe på sundag. Kaffi, kling og julekake får de kjøpt begge dagar.
Sundag i 13-tida er det felespel på Polen, ved Spelemannslaget Bøheringen.
Julemessa er open mellom kl 12 og 17 laurdag 25. og sundag 26. november. Velkomen skal du vere!