Bergit Li

Godt nytt museumsår!

Bø museum skal ha årsmøte tysdag 25. mars. Innkalling / meir informasjon kjem etter kvart.
Arrangement i løpet av våren blir lagt ut på heimesida når tema og dag er bestemt.
Vel møtt på arrangement på Bø museum!

Julehelsing

Foto: Cecilie Authen

Bø museum ønskjer medlemmer og alle andre ei fin julehøgtid og eit godt nytt år!
Program for 2025 er ikkje klart ennå, men arrangementa blir kunngjort i Bø blad, på heimesida og facebooksida til museet.
Velkomen på Bø museum sine arrangement i 2025!

Drikkeskikkar i Telemark
torsdag 5. desember 2024 kl. 19.00

I dette foredraget vil Ellen Schrumpf snakke om korleis drikkeskikkar og alkoholkonsum utvikla seg i Telemark på 1800-talet etter at brennevinslova av 1816 gjorde brennevinsbrenninga på bygdene fri. Det dreiar seg om konsum og drikkeskikkar i byar og bygder, i kyst-fylket og indre delar av fylket, i overklassa og blant bønder og underklassa i bygdene og byane. Ho tar utgangspunkt i Eilert Sundts undersøking av «ædruelighedstilstanden» i Norge frå slutten av 1850-tallet og stiller spørsmålet om telemarkingane var berarar av heilt spesielle drikkeskikkar. 
Ellen Schrumpf er professor emerita i historie og har skrive om barnearbeid, foreldreskap, Gunnar Knudsen og om Porsgrunns og Telemarks historie.
Inngang kr. 120,- inkl. enkel servering.

Julemesse 23. og 24. november på Oterholt

Velkomen til Bø museum og årets julemesse for heile familien, 23 og 24 november kl. 12-17.
Det blir som alltid julestemning med kafe; graut laurdag og suppe sundag. Sal av småkaker, brød, julekake, kling, kransekaker og meir i Åsestugo. På Pakkbua sal ulike handverksprodukt. Open utstilling i Utstillingsbygget. Nissen kjem, og det blir verkstad for barna med høve til å lage julepynt og skrive brev til nissen. Vi pyntar juletreet på museet med barna sin eigen julepynt. Felemusikk sundag ca kl 13.

Videokveld – ekstra framsyning
torsdag 14. november 2024 kl. 19.00

Da Bø museum nyleg arrangerte videokveld med framsyning av klipp frå samlinga etter Gunhild og Birger Kinck, kom det så mange at ikkje alle fekk plass på pakkbua på Åheim. Museet måtte stenge dørene, da ein ikkje vurderte det som forsvarleg å ta inn fleire. Museet er glad for godt frammøte, men lei for at dei måtte avvise folk. Torsdag 14. november blir det derfor halde ekstraframsyning, slik at fleire kan få med seg programmet. Det blir blant anna klipp med trehandverkaren Torvald Høydal og med Ragnhild Lia på Gavlesjåstulen, og glimt frå ein auksjon på Nordbø.
Vel møtt til ein hyggeleg videokveld på museet!
Inngang kr. 120,-

Liv Bratterud – torsdag 12. september kl 19.00

Eventyrforteljaren og balladesongaren som miste alt

Olav Solberg har nyleg gitt ut bok om Liv Bratterud (1826-1892) frå Bø, og denne kvelden vil han fortelje om henne og lagnaden hennar. I motsetning til mange andre tradisjonsberarar kom ho frå gode kår i det gamle Bøherad. Likevel enda ho opp som husmannskvinne på ein armodsplass i ville skogen. I ettertida er ho kjend som balladesongar og framifrå eventyrforteljar.
I boka si følgjer Solberg Liv Bratterud frå vogge til grav. Vi får også høyre om familien hennar – døtrene, ektemannen som drakk og slektningar som prøvde å hjelpe.
Olav Solberg er professor emeritus i nordisk litteratur ved Universitetet i Søraust-Noreg. Han har gjeve ut ei lang rekke bøker og vitskaplege artiklar og er ein av våre fremste spesialistar på folkedikting og mellomalderlitteratur.
Inngang kr 120 inkl enkel servering.

Liv Bratterud.

Gamle plagg fortel (seminaret er fullteikna)

NB: Seminaret er fullteikna.

Dagsseminar om folkedrakter med Kari-Anne Pedersen og Terje Lia laurdag 21. september 2024 kl. 09.30-16.00.
Stad: Bø museum, Oterholtvegen 148, 3802 Bø,

Kva kan me lære av gamle draktdelar? Går me gamle plagg etter i saumane – i bokstaveleg forstand, kan me hente mykje kunnskap om korleis dei er laga. Denne kunnskapen har me stor nytte av når me skal framstille bunader i dag. Dette er temaet for seminaret med Kari-Anne Pedersen og Terje Lia på Bø museum. Dei er begge svært opptekne av dette, og har lang erfaring frå feltet. Kari-Anne Pedersen, Oslo, er nyleg pensjonert konservator frå Norsk folkemuseum, der ho hadde ansvar for folkedrakter. Ho har skrive fleire bøker om emnet, og har fokusert på draktskikken i Aust-Telemark. Terje Lia frå Notodden er sjølverklært «bunadsnerd», han har laga bunader i ei årrekke og leverte nyleg bunad til prins Sverre Magnus. Han har mykje gamalt draktmateriale i sitt eige, som ei studiesamling, og ein del av dette vil han ha med seg til seminaret. Vidare blir det høve for deltakarane til å ta med gamle draktdelar som dei ønsker å få kommentar til.

Kl. 09.30: Frammøte og kaffi på Åheim, pakkbua
Kl. 10.00: Seminaret startar
Kl. 12.00: Dugurd (lunsj) på Polen
Kl. 13.00: Seminaret fortset
Kl. 16.00: Slutt

Deltakaravgift: Kr. 400,- inkl. kaffi ved ankomst, og dugurd.
Påmelding skjer på epost til post@bomuseum.no eller sms til nr 90136992. Deltakaravgifta betalast til Bø museum, konto nr. 2630.07.11269 eller Vipps nr 512181. Merk betalinga “Folkedraktseminar” og namn. Frist for påmelding og betaling av deltakaravgift er måndag 16. september. På grunn av plassen set me eit tak på 30 deltakarar. Meld gjerne frå om evt. allergiar ved påmelding, med tanke på serveringa.

Kari-Anne Pedersen, foto Helge Brekke.

Sommar på Bø museum

Bø museum er ope frå 29. juni til og med 28. juli, kl 12.00 til kl 17.00, tysdag til sundag.
Sommarutstilling “Hundre år med jernbane”.

Sundag 28. juli er siste opningsdag i sommar. Kl 15.00 vil Atle Tjønnås presentere nokre av felene i samlinga på Bø museum. Han har fått med seg drangedøl og spelemann Herman Gautefald som lar oss få høyre korleis dei let.
Frå ca kl 13.00 er det sal av kjøttsuppe, og sjølvsagt kaffi og vaffel, is, kake. Velkomen!

Arrangement sommaren 2024

Laurdag 29. juni kl. 13.00 Opning av sommarutstillinga “Hundre år med jernbane”. Program med bl a Gunleik Hynne og elevar ved Kulturskulen. Kaffi og kaker. Inngang 100 kr.
Sundag 30. juni kl. 17.00: Bygdevandring på Bø stasjon med Gunleik Hynne
Sundag 7. juli kl. 17.00: Konsert med gruppa Telehiv; Mari Foss, Harald Foss og Helge Røys: Nye og gamle grendeviser
Sundag 14. juli kl. 15.00: Bygdevandring på Oterholt med Finn Rønning
Sundag 21. juli kl. 15.00: Bø for hundre år sidan, ved Halvor Kleppen
Sundag 28. juli kl. 15.00: Atle Tjønnås og ein felespelar presenterer hardingfeler frå samlinga til museet
Museumsbutikk og kafe.
Velkomen til Bø museum i sommar!

Sommarutstillinga har fått støtte frå Telemark fylkeskommune.

Kvennøya

I mai har bålplassen på Kvennøya fått ei oppgradering. Gamal bålplass er fjerna, det er lagt eit område med grus, og ny bålring er bygd opp. Steinane har museet fått frå Steinsenteret, og Tor Sisjord har laga nye benkar.

Og her er dugnadskarane frå venstre: Karl Magne Verpe, Rolf Steinsland, Karl Åge Liland og Eivind S. Forberg.

Ei oppfordring til alle, hald plassen ryddig og fin, og ta med søppel heim!