De kulturhistoriske samlingane ved Bø museum
Bø museum starta tidleg med innsamling knytt til folkemusikk, folkedrakt og tradisjonskunst, og har på bakgrunn av dette store samlingar knytt til tematikken. I tillegg har museet sidan etableringa vore møteplass for utøving av folkemusikk og immateriell kulturarv, og samlingsporteføljen utgjer i dag viktige nasjonale samlingar av betydning. Bø museum sitt faglege og utførande arbeid er i dag forankra i ICOMs museumsetiske regelverk. Retningslinjene fastset minstestandardar for museum og museumsmedarbeidarars praksis og yrkesfaglege åtferd, og med konkretiserte retningslinjer vedtatt under årsmøta i 2021, vart dokumentet «Ope, inkluderande, transparent og profesjonelt: Etiske retningslinjer for museum i Noreg» publiserte i 2022. Dokumentet blir lagt til grunn i Bø museum sitt daglege arbeid.
Museet har store samlingar og enkelte gjenstandar som krev særleg varsam handtering og krevjande bevaring. Her kan mellom anna nemnast stokkebåt frå 900-talet, ei stor fotosamling på omkring 50 000 fysiske fotografi og ei av Noregs største samling hardingfeler som krev stor grad av krav til korrekt klima, som temperatur og luftfukt. Museet bevarer samtidig ei rekkje større landbruksreiskapar og køyretøy, som ikkje berre krev bevaringsomsyn, men som også er kostnadskrevjande av omsyn til avgrensa fysiske bevaringsmoglegheiter for slike gjenstandar.
Det blir elles arbeidd kontinuerleg med å formidla samlingane til museet på digitaltmuseum.no, gjennom historiske publikasjonar, ein årleg kalender og igangverande forsking knytt til samlingane. Arbeidet blir utført både i regi av Bø museum, i samarbeid med andre, og det vil bli satsa på å laga digitale utstillingar framover da det når mange av publikummarane til museet nasjonalt og internasjonalt.
Tilgang til og formidling av samlingane
Publikum har tilgang til Bø museum sine samlingar gjennom fysiske besøk og digitalt igjennom digitaltmuseum.no. Elles kan og skal så langt det lèt seg gjera, det materiale som er ordna, registrert og magasinert bli henta fram til publikum ved behov og på førespurnad. Samlingar som er svært lite tilgjengeleg, eller uordna kan i særlege tilfelle ikkje formidlast til publikum, men det er ambisjonen til museet på sikt å få tilrettelagt formidlingsmoglegheiter for alle samlingane til museet.
Forsking og eventuelt forskingsførebuande arbeid og formidling
Bø museum har gjennom mange år vore aktiv bidragsytar til forsking og forskingsformidling av samlingane. Kunnskap og samlingar har vore formidla igjennom fleire svært omfangsrike publikasjonar, igjennom studentarbeid og anna forsking som master, doktorgrader og liknande. Frå og med haust 2024 har tilsett dagleg leiar forskarkompetanse og det vil vera ein ambisjon parallelt med anna arbeid, å prøve å bidra aktivt til forskingsbasert formidling av samlingane til museet og tilknytt kulturhistorie, både internt og eksternt. Frivillige og tilknytte ved Bø museum har også igjennom mange år bidrege til ulik grad av forsking og forskingsaktivitet, og mellom anna blir ei rekkje gode publikasjonar tilbodne for sal ved museet.